उपाधिको होडमा बार्सिलोना र रियल म्याड्रिड, आज पौने १२ बजे खेल
स्पेनिस ला लिगाको बाजी रियल म्याड्रिड र बार्सिलोनामध्ये कसले मार्ने हो? यसको निर्णय आज राती हुने भिन्दा भिन्दै भिड्न्तपछि टुँगो लाग्नेछ।
स्पेनिस ला लिगाको निर्णायक खेलअन्तर्गत रियलले आज राती ११ बजेर ४५ मिनेटमा मालागा क्लबको घरेलु मैदान ला रोसालेडामा खेल्दैछ। रियल ३७ खेलमा ९० अंक जोडेर शीर्ष स्थानमा छ।
रियललाई अंक तालिकामा पछ्याइरहेको बार्सिलोनाको ३७ खेलबाट ८७ अंक छ। ऊ ३ अंकले मात्र आफ्नो प्रतिद्वन्दीभन्दा पछाडि छ। आज राती सोही समयमा बार्सिलोना आफ्नो घरेलु मैदान क्याम्प नोउमा एइबारविरुद्ध खेल्दैछ।
रियल म्याड्रिड लिगको मध्यमा रहेको मालागासँग पराजित भए र बार्सिलोनाले लिगको आठौं स्थानमा रहेको एइबारलाई पराजित गरेको खण्डमा मात्र बार्सिलोनालगातार तेस्रो पल्ट उपाधि जित्न सफल हुनेछ।
रियल आज बराबरीमा खेल राखे मात्र उपाधि जित्न सफल हुनेछ। जोसे माउरिन्होको प्रशिक्षणमा रियलले पछिल्लो पल्ट २०१२ मा घरेलु उपाधि जितेको थियो। यतिबेला जिनेदिन जिदानको प्रशिक्षणमा रियल ५ वर्षपछि उपाधि जितको नजिक छ।
बार्सिलोना भने २०१५ देखि ला लिगा विजेता हो। उसलाई यसपालि एक खेल बाँकी रहेको अवस्थामा रियलले अंक तालिकामा उछिनेको छ। आज बार्सिलोनाका प्रशिक्षक लुइस एनरिकको क्याम्प नोउमा अन्तिम खेल पनि हो। उनले यसअघि नै सिजनको अन्त्यमा सन्यासको घोषणा गरिसकेका छन्।
३ वर्षअघि बार्सिलोनाको प्रशिक्षक नियुक्त भएका एनरिकले यस अवधिमा क्याटलान क्लबलाई २ वटा घरेलु उपाधि र एउटा च्याम्पियन्स लिगको उपाधि जिताएका थिए। तर, अन्तिम वर्ष उनी उपाधि बिहिन बन्ने सम्भावना बलियो छ। आज बार्सिलोनाले उपाधि जितेको खण्डमा उनको लागि ठूलो उपहार हुनेछ।
